Joseph Kenny OP: The Psalms, 119-081 (Hebrew)

Psalm 119:81-88

Saturday Midday 2

כָּלְתָה לִתְשׁוּעָתְךָ נַפְשִׁי	לִדְבָרְךָ יִחָלְתִּי
כָּלוּ עֵינַי לְאִמְרָתֶךָ	לֵאמֹר מָתַי תְּנַחֲמֵנִי

כִּי־הָיִיתִי כְּנֹאֵד בְּקִיטוֹר	חֻקֶּיךָ לֹא שָׁכָחְתִּי
כַּמָּה יְמֵי־עַבְדֶּךָ	מָתַי תַּעֲשֶׂה בְרֹדְפַי מִשְׁפָּט

כָּרוּ־לִי זֵדִים שִׁיחוֹת	אֲשֶׁר לֹא כְתוֹרָתֶךָ
כָּל־מִצְוֹתֶיךָ אֱמוּנָה	שֶׁקֶר רְדָפוּנִי עָזְרֵנִי

כִּמְעַט כִּלּוּנִי בָאָרֶץ	וַאֲנִי לֹא־עָזַבְתִּי פִקֻּודֶיךָ
כְּחַסְדְּךָ חַיֵּנִי	וְאֶשְׁמְרָה עֵדוּת פִּיךָ