Joseph Kenny OP: The Psalms, 149 (Hebrew)

Psalm 149

Sunday Morning 1

הַלְלוּ יָהּ

שִׁירוּ לַיהוָה שִׁיר חָדָשׁ	תְּהִלָּתוֹ בִּקְהַל חֲסִידִים
יִשְׂמַח יִשְׂרָאֵל בְּעֹשָׂיו	בְּנֵי־צִיּוֹן יָגִילוּ בְמַלְכָּם
יְהַלְלוּ שְׁמוֹ בְמָחוֹל	בְּתֹף וְכִנּוֹר יְזַמְּרוּ־לוֹ

כִּי־רוֹצֶה יְהוָה בְּעַמּוֹ	יְפָאֵר עֲנָוִים בִּישׁוּעָה
יַעְלְזוּ חֲסִידִים בְּכָבוֹד	יְרַנְּנוּ עַל־מִשְׁכְּבוֹתָם
רוֹמְמוֹת אֵל בִּגְרוֹנָם	וְחֶרֶב פִּיפִיּוֹת בְּיָדָם

לַעֲשׂוֹת נְקָמָה בַּגּוֹיִם	תּוֹכֵחֹת בַּלְאֻמִּים
לֶאְסֹר מַלְכֵיהֶם בְּזִקִּים	וְנִכְבְּדֵיהֶם בְּכַבְלֵי בַרְזֶל
לַעֲשׂוֹת בָּהֶם מִשְׁפָּט כָּתוּב	הָדָר הוּא לְכָל־חֲסִידָיו

הַלְלוּ־יָהּ